БАЦЬКАЎШЧЫНА СВЕТЛАЯ МАЯ

Першы нацыянальны канал Беларускага радыё разам з часопісам “Маладосць” на пачатку кастрычніка абвясцілі аб правядзенні літаратурнага праекта-конкурса, прысвечанага Году малой Радзімы “Бацькаўшчына светлая мая”. Мэта гэтага конкурсу – даць магчымасць слухачам і чытачам у мастацкай форме выказаць любоў да роднай зямлі, паказаць яе прыгажосць, гісторыю, культуру: вобразна, шчыра, арыгінальна.

Пра тое, якім стаў пачатак, пра прынцыпы адбору пераможцаў, а таксама пра тое, што варта ўлічыць удзельнікам конкурса, якія толькі плануюць прымаць у ім удзел, гутарку вялі госці студыі — галоўны рэдактар часопіса «Маладосць» Святлана Воцінава, паэт, лаўрэат Дзяржаўнай прэміі Беларусі Мікола Мятліцкі, пісьменніца, загадчык аддзела прозы часопіса «Маладосць» Маргарыта Латышкевіч, рэдактар аддзела літаратурна-мастацкіх праграм Першага нацыянальнага канала Беларускага радыё Маргарыта Прохар — члены журы, а таксама паэты Таццяна Атрошанка і Кастусь Цыбульскі — канкурсанты, творы якіх разам з творамі яшчэ чытырох канкурсантаў — Вольгі Галдыцкай, Соф’і Мароз, Яўгена Карпуця і Мікалая Салаўцова надрукаваны ў лістападаўскім нумары часопіса “Маладосць”. А верш Міколы Салаўцова ў яго выканані прагучаў і па рэспубліканскаму радыё на першым нацыянальным канале 1 снежня. Жыхары Чавускага раёна папярэдне віншуюць Міколу Салаўцова з перамогай у творчым конкурсе за кастрычнік месяц.

Усяго за кастрычнік месяц конкурса арганізатары атрымалі 55 твораў ад 16 аўтараў. Умовы конкурса на сайтах Першага нацыянальнага канала Беларускага радыё і часопіса “Маладосць”. У ім могуць прыняць усе жадаючыя.

ПОМНІЦЬ ПРОНЯ
Помніць сёння рэчка Проня
Бой з фашысцкаю ардой,
Помніць Проня, помніць сёння
За свабоду смертны бой…
Помняць Чавусы сягоння
Свісты куль і выбух мін-
Дзевяць месяцаў за Проню
Бой кіпеў, як за Берлін…
Помніць Проня тую бойню,
Хлопцаў смелых, маладых,
Помніць Проня кроў на ўлонні,
Помніць мёртвых і жывых…
Помніць сёння рэчка Проня
Голас  тых трагічных муз-
Тых Іванаў растраляных
За Еўропу, за Саюз…
Помніць Проня Буйніч поле,
Помніць кожны абеліск,
Тых Іванаў растраляных
За Маскву, за родны Мінск…
Помніць сёння рэчка Проня
Як пад сцягамі бацькоў
Па геройскі нашы войскі
Баранілі Магілёў…
Помніць Проня тую сілу,
Будзе помніць шмат вякоў,
Нашу мужнасць, што радзіла
Шэсць герояў-землякоў!..
Помніць сёння рэчка Проня
Радасць стрэч і боль маны…
Помніць Проня, помніць сёння
ПЕРАМОЖНЫ ДЗЕНЬ ВАЙНЫ!..
МІКОЛА САЛАЎЦОЎ, г. ЧАВУСЫ.