У Чавускай раённай дзіцячай бібліятэцы 21 лютага прайшла цікавая сустрэча з паэтам, сябрам Саюза пісьменнікаў Беларусі Міколам Салаўцовым, прымеркаваная да Міжнароднага Дня РОДНАЙ МОВЫ з вучнямі сярэдняй школы №1, якую ладзіла загадчыца дзіцячай бібліятэкі Таццяна Аляксееўна Філіпенка разам з класнай настаўніцай Антанінай Уладзіміраўнай Шэмянковай. У зале была арганізавана выстава кніг паэта. Напачатку загадчыца бібліятэкі Таццяна Аляксееўна расказала аб жыццёвым і творчым шляху паэта Міколы Салаўцова, на долю якога выпаў цяжкі лёс, як на дзіця вайны, паведала з якога часу ўсталяваўся ў свеце Міжнародны дзень роднай мовы, які штогодна адзначаецца і ў Беларусі.
   Потым дзеці чыталі яго вершы аб мове, аб роднай Беларусі, рыфмавалі падказаныя ім словы, гулялі ў розныя літаратурныя гульні. У канцы сустрэчы Мікалай Іванавіч расказаў аб сваіх творчых здабытках, аб сустрэчах са знакамітымі паэтамі і пісьменнікамі: Максімам Танкам, Васілём Быкавым, Уладзімірам Караткевічам, Уладзімірам Паўлавым, Пятром Прыходзькам, Авер"янам Дзеружынскім, які бым рэдактарам яго першай кніжкі для дзяцей, што выйшла ў выдавецтве "Мастацкая літаратура"- "Вавёрчын веласіпед", а праз год - новая кніга для дзяцей "Чаму плуг не ржавее" аб сельскагаспадарчых машынах і прыладах. На гэтыя першыя кніжкі вельмі станоўчыя далі рэцэнзіі: Максім Танк, Аляксей Пысін і Мікола Давідовіч. На вечарыне паэт Мікола Іванавіч прачытаў шмат вершаў, прысвечаных роднай мове і нашай квітнеючай Беларусі, якія вучні вельмі ўважліва слухалі, прыслухоўваючыся да кожнага слова паэта. А адна  дзяўчынка - ўдзельніца вечарыны, нават паказала Мікалаю Іванавічу яго кнігу з аўтографам, якую ён падарыў у 2002 годзе яго маці-настаўніцы, калі выступаў у школе.                                              Прапануем Вашай увазе невялічкі фотарэпартаж з гэтага мерапрыемства, падрыхтаваны настаўніцай СШ№1 Іннай Анвараўнай Абраевай. Відэарэпартаж з гэтага мерапрыемства будзе зроблены крыху пазней.