ГІМН ГАЗАВІКОЎ
  (У абласным конкурсе заняў другое месца)           
Мы славім наш край Беларускі і час,
Шляхі ў нас свае, не благія…
Па трубах блакітнае паліва -газ
Плыве да нас з братняй Расіі...
Мы крочым сваёю дарогай бацькоў,
Яднае Саюз і свабода,
Нас цэлая армія газавікоў
Працуе на шчасце народа!
Нібыта салдаты, на варце стаім,
Сталь варым, даём рух машынам,
Нязгасным агнём у кацельнях гарым,
Нясём у кватэры пах блінны.       
Стваральнаю працай будуем свой Дом,
З надзеяй на дні залатыя...
Штодзень грэем край  Беларускі цяплом,
Шлём дзякуй народу Расіі!

НАПІТАК КОКА - КОЛА
Я помню, як скрыню бутэлек з Масквы
Прывёз сакратар нам райкома...
Як боскі напітак з Венернай травы
Яго смакавалі мы дома...
Нібыта шампанскага – прысмак яго,
А колер – нібы ў партбілета...
Дзе гэты напітак купіць і ў каго?-
Па блату ў абкомных буфетах...
Патрапіць туды не маглі мы ў іх “рай”,
Каўбаскі купіць, ці пельменяў...
А зараз дзе хочаш, што хочаш купляй,
Былі б...толькі грошы ў кішэні.
Сягоння ты можаш гуляць і ў лато-
І  выйграць мільярды, ці хату...
Абутак, серванты, любое аўто –
Купляй, што жадаеш без блату...
Тады ж – грошы ў нас крыху ўдосталь былі,
Купляць не маглі мы нічога...
Вось так мы ў Саюзе рэспублік жылі
З партыйным білетам без Бога...
Як кажуць, мінулае ўсё ўжо прайшло,
На заўтрашні дзень мы ўсе ласы...
Што ж лепей –каб грошай удосталь было,
Ці блат на тавары, каўбасы?..
Я ведаю ўжо, што вы скажаце мне:
Каб грошы былі і тавары...
Працуйце – і нас дабрабыт не міне,
І збудуцца ўсе нашы мары!..

АЎТОГРАФ
“Без роднай мовы, культуры і тэрыторыі-любы
народ, як нацыя, існаваць на зямлі не можа…”
                                                      У.І. Ленін.
Мой подпіс- аўтограф у гэты Год кнігі
Для матчынай мовы чакае адлігі,
Я веру, што родная мова ў краіне
На покуце будзе заўжды гаспадыняй…
Паўсюдна пачне беларуская мова
Сваё выдаваць чыстакроўнае слова:
У класах, на вуліцах і на плакатах,
І несці нам шчырасць і радасць у хаты.
Бо кажуць – без матчынай мовы, культуры
Мы станем нямымі, глухімі ў натуры…
Дзе родную мову не любяць і дзеці –
Там знікне народ той, як нацыя, ў свеце.
Аб гэтым  сягоння я ўслых гавару
І родны аўтограф музею дару
На кнігах уласных, на кнігах сардэчных,
Каб разам з Краінай жылі яны вечна!
А гэту вось кнігу дару я музею
“Азбуку зорнага неба”,
Як бохан духмянага хлеба,
На шчасце, нібыта касмічную Фею,
На доўгія годы людзям на ўспаміны,
На ёй касманаўт свой аўтограф пакінуў!
                   30.08.2012 г.

ПАСЛАНЕЦ АД БОГА
              Жарт.
Вось  прыйшоў ужо канец
Побыту зямному,
Скінуў я з жыцця вянец,
І пайшоў “да дому”…
Азірнуўшыся назад
На свой шлях пражыты-
Я Крыжу быў вельмі рад,
Помніку з граніту…
І паслаў свой Запавет
З Раю –  свету тога:
-Хай жыве між вас паэт –
Пасланец ад Бога!..